A FOLKTALE IN DIOLA KWAATAY DIALECT
Click here to edit.
Spoken in around the village of Diembering, this dialect is the least understood by Diola speakers. a translation will be provided soon.
Jákuruk, jákarniina ni jajaamel
Árimoomi iŋi Naŋ un búkuruk bu ifi biteyoor un búwotoor bu? Sijaameel su, árimoomi iŋi naŋ n’ufu sujuk éwotoor ni siteyi? Síkarniina su yooŋ, árimoomi iŋi naŋ ni síteyaarit fu éwotoor? Inje kasokuun.
Abajebaj. Jákarniin, ni jákuruk, ni jajaarmeel; bokiin kabine kaja t’eke ésuk, ti karuwiin. Ásuŋgute ite ake áwiyiiin aware biseño, náami faafo eeruwiin kaanuku keeja keemat.
Kareeŋa bo, náami makamu bokiin emoosoora, ni kasaaniin eke enuuf kaanuku keeriiko toko. Biseño bu uŋu butoof naane, abe bakate hikinu hu ni kajokiin áwariaa. Ake ti bakate hikinu hu af’aja aane káhamin n’emoosoora i, jajaameel n’aŋ’ánuutann sirirem tu huboote hoone awuno. Hibin hireeŋ toko n’ajuk kaanuku afut’araan, man abin áyini bíyeetina, ábuka kawarawar kafaasu t’éwotoor.
Abaj kunak, jákuruk n’aane banano káyeetin. Ni kaja bija t’ániine u eeruwiin u, keesoko kaanuku keeyeet. HI kaje hu bija t’éwotoor i, jákarniina n’ajaam abe n’ajufo; sirirem s’asaane su, an awaruto kabatikan doon.
Jákuruk n’ajaam yooŋ, abe n’asiiŋo eenahan kaanaku ateyana u eebatikano ewejet yeene, ábuka sirirem soone sihaŋahaŋ. Ateyana u n’aano abajut ewejet, bare ifi káreeŋin, n’aŋ’abatikano.
Jajameel afinut aŋaaŋ kálilan; n’aruw ate éwotoor i kaanuku kéehamin t’ésubaiin. N’aano:
-Nu múniyo ílianut, bare uf’úreŋ, inje kasoku bakanam keemaaganam iisani ajok toko tu sonde.
Ateyana u n’asa so abe jajaamel n’ájufo. Náami éwotoor i yéesitin.
Jajaameel n’áyemi toko ti kayinoor naane aware káhinu ákanaami afaka; ábuka ámoomi kaanuku af’asok banano, iti kamaagano; ti hikinu hooniin yooŋ, wumaag woone iŋ’ite te wóiit. Ondu ti biyinoor bondu, náami éwotoor i ehaŋa ereeŋ. Jákarniina náwano, abe n’ásitin yooŋ aja.
Jakuruk n’awano abe n’asiiŋo eenahan kaanuku áyin u eebatikano ewejet yeene.
Áyin u n’afin ajumban bija ti jajaameel abe n’aano álilano sirirem soone. Jajameel, náami makamu abajut, ni vino músuwaay. N’áyemi toko t’ésuw.
Áyin u n’ayooso t’éwotoor i abe n’ánuutin n’elame. Áreeŋin, náami jajaameel t’ésuw i; n’aŋ’ahaŋ yooŋ kasibu, “tañaŋ”, t’erofan i. Kaen jajaameel ayinaat kateyi, bare af’ajuko ti kafaratatan ku, aa.
Áyin u n’ateyoor ne o toko, bare, kane arko jájaameeliit. Jákuruk yooŋ ti kanabaniin kep, kaanuku ateyana u eebatikano. Áyin u n’ábatikein; náami makamu ayiŋatayiŋat, abe yooŋ elame yendo t’emoŋio, jákuruk akañenut kaloheno. N’aŋ’ásiiŋein akamb eesao ti hiñaawu, ti kasoku te o kep.
Áyin u areeŋa éwotoor i, n’ájufo. Éwotoor i efina ésitin, jákuruk n’ateyoor ne yo akamb sat, bare ajokut yo. N’abatijo ayeet.
Bondu bíkinineŋe fu, ékuruk, t’ejuke éwotoor fe, n’eŋ’eteyoor ne yo iŋ’ite ewejet yendu.
Ejaameel ef’ejuk éwotoor, n’eŋ’eteyi ábua eŋ’eene man áyin u ásooñina bite sirirem soone.
Ékarniina n’efin ejuk éwotoor, et’etey; áwaasiit yooŋ ateyana u n’aŋ’ajendan búwaneina éekutoor yo,
Kuŋkuŋ kures.
Jákuruk, jákarniina ni jajaamel
Árimoomi iŋi Naŋ un búkuruk bu ifi biteyoor un búwotoor bu? Sijaameel su, árimoomi iŋi naŋ n’ufu sujuk éwotoor ni siteyi? Síkarniina su yooŋ, árimoomi iŋi naŋ ni síteyaarit fu éwotoor? Inje kasokuun.
Abajebaj. Jákarniin, ni jákuruk, ni jajaarmeel; bokiin kabine kaja t’eke ésuk, ti karuwiin. Ásuŋgute ite ake áwiyiiin aware biseño, náami faafo eeruwiin kaanuku keeja keemat.
Kareeŋa bo, náami makamu bokiin emoosoora, ni kasaaniin eke enuuf kaanuku keeriiko toko. Biseño bu uŋu butoof naane, abe bakate hikinu hu ni kajokiin áwariaa. Ake ti bakate hikinu hu af’aja aane káhamin n’emoosoora i, jajaameel n’aŋ’ánuutann sirirem tu huboote hoone awuno. Hibin hireeŋ toko n’ajuk kaanuku afut’araan, man abin áyini bíyeetina, ábuka kawarawar kafaasu t’éwotoor.
Abaj kunak, jákuruk n’aane banano káyeetin. Ni kaja bija t’ániine u eeruwiin u, keesoko kaanuku keeyeet. HI kaje hu bija t’éwotoor i, jákarniina n’ajaam abe n’ajufo; sirirem s’asaane su, an awaruto kabatikan doon.
Jákuruk n’ajaam yooŋ, abe n’asiiŋo eenahan kaanaku ateyana u eebatikano ewejet yeene, ábuka sirirem soone sihaŋahaŋ. Ateyana u n’aano abajut ewejet, bare ifi káreeŋin, n’aŋ’abatikano.
Jajameel afinut aŋaaŋ kálilan; n’aruw ate éwotoor i kaanuku kéehamin t’ésubaiin. N’aano:
-Nu múniyo ílianut, bare uf’úreŋ, inje kasoku bakanam keemaaganam iisani ajok toko tu sonde.
Ateyana u n’asa so abe jajaamel n’ájufo. Náami éwotoor i yéesitin.
Jajaameel n’áyemi toko ti kayinoor naane aware káhinu ákanaami afaka; ábuka ámoomi kaanuku af’asok banano, iti kamaagano; ti hikinu hooniin yooŋ, wumaag woone iŋ’ite te wóiit. Ondu ti biyinoor bondu, náami éwotoor i ehaŋa ereeŋ. Jákarniina náwano, abe n’ásitin yooŋ aja.
Jakuruk n’awano abe n’asiiŋo eenahan kaanuku áyin u eebatikano ewejet yeene.
Áyin u n’afin ajumban bija ti jajaameel abe n’aano álilano sirirem soone. Jajameel, náami makamu abajut, ni vino músuwaay. N’áyemi toko t’ésuw.
Áyin u n’ayooso t’éwotoor i abe n’ánuutin n’elame. Áreeŋin, náami jajaameel t’ésuw i; n’aŋ’ahaŋ yooŋ kasibu, “tañaŋ”, t’erofan i. Kaen jajaameel ayinaat kateyi, bare af’ajuko ti kafaratatan ku, aa.
Áyin u n’ateyoor ne o toko, bare, kane arko jájaameeliit. Jákuruk yooŋ ti kanabaniin kep, kaanuku ateyana u eebatikano. Áyin u n’ábatikein; náami makamu ayiŋatayiŋat, abe yooŋ elame yendo t’emoŋio, jákuruk akañenut kaloheno. N’aŋ’ásiiŋein akamb eesao ti hiñaawu, ti kasoku te o kep.
Áyin u areeŋa éwotoor i, n’ájufo. Éwotoor i efina ésitin, jákuruk n’ateyoor ne yo akamb sat, bare ajokut yo. N’abatijo ayeet.
Bondu bíkinineŋe fu, ékuruk, t’ejuke éwotoor fe, n’eŋ’eteyoor ne yo iŋ’ite ewejet yendu.
Ejaameel ef’ejuk éwotoor, n’eŋ’eteyi ábua eŋ’eene man áyin u ásooñina bite sirirem soone.
Ékarniina n’efin ejuk éwotoor, et’etey; áwaasiit yooŋ ateyana u n’aŋ’ajendan búwaneina éekutoor yo,
Kuŋkuŋ kures.
